Kredit borcunun avtomatik ödənilməsi

Kredit öhdəlikləri üzrə ödənişlərin gecikdirildiyi təqdirdə, “KredAqro” BOKT MMC mövcud müqavilə şərtlərinə əsasən, borcun ödənilməsi məqsədilə müştərinin bank kartından vəsaitin akseptsiz (avtomatik) qaydada silinməsi təşəbbüsü ilə çıxış etmək hüququna malikdir. Əməliyyat icra olunduqdan sonra, kartı emissiya edən bank tərəfindən müştəriyə ödənişin məbləği və təyinatı barədə müvafiq bildiriş təqdim olunur. Bu məlumatlar bankın mobil tətbiqi vasitəsilə və ya SMS məlumatlandırma xidməti ilə müştəriyə çatdırılır.

Cari borc məbləği barədə məlumatı “KredAqro” mobil tətbiqinin “Kreditlərim” bölməsinə keçid edərək əldə edə bilərsiniz.

Vəsaitlərin avtomatlaşdırılmış qaydada tutulması tərəflər arasında imzalanmış Kredit Müqaviləsinin (Ümumi və Fərdi şərtlər) müvafiq bəndlərinə əsasən icra olunur. Müqavilə şərtlərinə görə, borcalanın öhdəlikləri üzrə gecikmə yarandığı təqdirdə, Kreditor (“KredAqro” BOKT MMC) borcun ödənilməsi məqsədilə müştəriyə əlavə bildiriş göndərmədən (akseptsiz qaydada) aşağıdakı mənbələrdən vəsait tutmaq hüququna malikdir:
1. Kreditin verilməsi üçün istifadə olunmuş bank kartlarından;
2. Kreditin geri ödənilməsi məqsədilə sistemə tanıdılmış kart hesablarından.

Bu prosedur müqavilə ilə təsbit edilmiş öhdəliklərin vaxtında icrasını təmin etmək və borcun daha da artmasının qarşısını almaq məqsədi daşıyır.

Kredit müqaviləsinin Fərdi şərtlərinin 16-cı bəndinə əsasən, hesabdardan silinən məbləğin tərkibi aşağıdakı ödəniş öhdəliklərindən ibarətdir:
1. Planlı aylıq ödəniş (Müvafiq ödəniş qrafiki üzrə cari ay üçün nəzərdə tutulmuş borc məbləği);
2. Birdəfəlik dəbbə pulu (Gecikdirilmiş əsas borc məbləğinin ilk təqvim günü üçün hesablanan 5% (beş faiz) miqdarında cərimə);
3. Gündəlik gecikmə faizi (Gecikmənin davam etdiyi hər növbəti təqvim günü üçün tətbiq edilən 1% (bir faiz) miqdarında cərimə).

“KredAqro” BOKT MMC ilə imzalanmış qüvvədə olan kredit müqaviləsi, habelə müqavilənin fərdi və ümumi şərtləri “KredAqro” mobil tətbiqinin “Kreditlərim” bölməsində elektron formada yerləşdirilmişdir. Müştərilər şəxsi kabinet vasitəsilə müvafiq sənədləri elektron qaydada nəzərdən keçirə və ya yükləyə bilərlər.